Во врска со употребата на алтернативните горива RDF (Refuse Derived Fuel) за производство на клинкер во ротирната печка на Цементарницата Усје АД Скопје, Државниот инспекторат за животна средина на ден 12.12.2019г. во 10 часот започна вонреден инспекциски надзор во цементарницата при што констатира дека ТИТАН Цементарница Усје АД Скопje поседува дозвола за увоз на алтернативното гориво RDF (Refuse Derived Fuel) со бр. УП1-11/2-159/2019 од 29.05.2019г. во количина од 10.000 тони (тарифен бр.382590 90 33) за цела 2019 година. Досега во 2019г. има увезено само 5.000 тони од споменатото алтернативно гориво. Пратката е обезбедена со Меѓународна нотификација според Базелската конвенција за нејзино прекугранично движење преку земјите во Европската Унија. Алтернативното гориво RDF (Refuse Derived Fuel) потекнува од фирмата DECO S.P.A- Preveza, Италија.
Покрај ова алтернативно гориво кое ТИТАН Цементарница Усје АД Скопje го користи во количина од 8%-10% од вкупната енергетска моќност на вкупното горивото, како RDF се користат и лушпи од оризова арпа набавени од Кочанскиот регион во Република С.Македонија.
На 10.12.2019г. во Цементарницата Усје АД Скопје пристигната е пратка на парчиња текстил во количина од 5,98 тони, набавени од фабриката Adient за производство на навлаки за седишта во автомобилската индустрија. Фабриката се наоѓа во просториите на поранешен Johnson Control во ТИРЗ-Штип во Република С.Македонија. Пратката е обезбедена со потребната документација за транспорт според нашето Национално Законодавство (Транспортен и идентификационен формулар). Парчињата текстил пробно би се употребувале како алтернативно гориво.
За употребата на алтернативни горива ТИТАН Цементарница Усје АД Скопje од МЖСПП има добиено Измена на А-Интегрираната еколошка дозвола за усогласување со оперативен план бр.11-1227/3 од 22.05.2013г.
Од добивањето на оваа измена, а и претходно, Државниот инспекторат за животна средина во Цементарницата Усје АД Скопје редовно врши редовни инспекциски надзори во секој квартал од годината, а почесто и вонредни инспекциски надзори, зависно од потребата. Последен пат ДИЖС во Цементарница Усје АД Скопje има извршено вонреден инспекциски надзор на 12.11.2019г.
Во моментот на вонредниот инспекциски надзор, извршен на 12.12.2019г. работеше само едната ротирна печка за производство на клинкер. При надзорот беше извршен и увид во континуираниот 24 часовен мониторинг на емисија на гасови од оџакот на печките за параметрите : NOx, SOx , CO, CO2 и прашина. При тоа отпечатен е и листинг од мониторингот за последните 24 часа, кој е земен во прилог на записникот. Според мониторингот, измерените вредности на наведените параметри се во рамките на ГВЕ ( Гранични вредности на емисија), определени во А–Интегрираната еколошка дозвола за усогласување со оперативен план и Правилникот за гранични вредности на емисија на гасови од стационарни извори......... ( Сл. Весник на Р.М. бр.141/2010).
13.12.2019г.
Скопје
ДРЖАВЕН ИНСПЕКТОРАТ
ЗА ЖИВОТНА СРЕДИНА